ការសាបសំណាប​និងការស្ទូងស្រូវ

ការរៀបចំដី និងការប្រើជីក្នុងថ្នាលសំណាប

សំណាប​​ថ្លោសល្អ​នាំមកនូវទិន្នផលច្រើន។ 

យោងទៅតាមការសិក្សាស្រាវជ្រាវអំពីដំណាំស្រូវ ឲ្យដឹងថា វិធីសាស្ត្រប្រើ ប្រាស់ជី
នៅក្នុងថ្នាលសំណាបជាវិធីសមស្របមួយក្នុងការបង្កើនទិន្នផលស្រូវ។

លោក ភាវ សុវុទ្ធី ប្រធានស្តីទី នៃនាយកដ្ឋានគ្រប់គ្រងធនធានដីនៃ ក្រសួងកសិកម្ម
រុក្ខាប្រមាញ់ និង នេសាទ កម្ពុជា នៅក្រុងភ្នំពេញ មានប្រសាសន៍ថា កសិករខ្មែរនិយមដាក់ជីនៅក្នុងថ្នាលសំណាបជាជាងក្នុងស្រែសន្ទូង។

លោក ភាវ សុវុទ្ធី មានប្រសាសន៍ថា មានកត្តាសំខាន់ច្រើនយ៉ាងដែលនាំឲ្យ
ប្រជាកិសករខ្មែរប្រើជីនៅក្នុងថ្នាលសំណាបជាជាងនៅក្នុងស្រែសន្ទូង។

ប្រជាកសិករខ្មែរបានប្រើជីប្រហែល៨០ភាគរយទៅលើថ្នាលសំណាប ជាជាង
នៅក្នុងស្រែសន្ទូង ពីព្រោះលោកយល់ថា កាលណាសំណាបល្អ សន្ទូងក៏ល្អ
ហើយទិន្នផលក៏ទទួលបានច្រើនដែរ ៕

រយៈពេល៖
វាគ្មិន៖ លោក ភាវ សុវុទ្ធី ប្រធានស្តីទី នៃនាយកដ្ឋានគ្រប់គ្រងធនធានដីនៃ
ក្រសួងកសិកម្ម រុក្ខាប្រមាញ់ និង នេសាទ កម្ពុជា

ការធានាឲ្យបានសំណាបថ្លោសល្អសម្រាប់យកទៅស្ទូង

កសិករ​ដកសំណាបយកទៅស្ទូង។

ដើម្បីឲ្យកសិផលរបស់់ខ្លួនមានកំរិតខ្ពស់ និងមានគុណភាពកាន់តែប្រសើរឡើងនោះ កសិករត្រូវការនូវការយល់ដឹងជាមូលដ្ឋានមួយចំនួនអំពីបច្ចេកទេសនៅក្នុងការដាំដុះ។

ដូចគ្នានេះដែរ កសិករផលិតដំណាំស្រូវដែលប្រាថ្នាចង់បានឲ្យទិន្នផលស្រូវរបស់ខ្លួន
កើនឡើង គប្បីស្គាល់នូវបច្ចេកទេសដាំដុះថ្មីៗ និងគន្លឹះសំខាន់ៗខ្លះក្នុងការដាំដំណាំ
ស្រូវ។ ឧទាហរណ៍មានដូចជា ការជ្រើសរើសគ្រាប់ពូជ ការរៀបចំដី ការប្រើប្រាស់ជី
ការការពារសត្វចង្រៃ ការគ្រប់គ្រងទឹក ការគ្រប់គ្រងជីនៅលើថ្នាលសំណាបនិងការ
ថែទាំសំណាបជាដើម ។

តាមការស្រាវជ្រាវរបស់ក្រសួងកសិកម្មកម្ពុជា កន្លងមកបានរកឃើញថាកាលណា
សំណាបល្អ សន្ទូងក៏ល្អដែរ ហើយទិន្នផលក៏ខ្ពស់ដែរ ដោយផ្អែកទៅលើគុណភាព
របស់សំណាប។

ជាមួយគ្នានេះដែរ មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (សេដាក)
និយាយថា សំណាបថ្លោសល្អ ជាកត្តាដ៏សំខាន់បំផុតមួយ ដើម្បីឲ្យស្រូវកសិករ
លូតលាស់បានល្អ និងនាំមកទិន្នផលខ្ពស់។

មជ្ឈមណ្ឌលនេះ បានណែនាំឲ្យកសិករសាកល្បងអនុវត្តតាមបច្ចេកទេសមួយចំនួន៕

វាគ្មិន៖ បណ្ឌិតយ៉ង សាំងកុមារ នាយកមជ្ឈមណ្ឌលសិក្សា និងអភិវឌ្ឍន៍កសិកម្ម កម្ពុជា